Sólbað í fárviðri!

Flestir virðast sammála um að rekja megi vanda bankanna til hinnar alþjóðlegu lausafjárkreppu. Margir benda reyndar á eitt og annað sem gæti hafa orsakað vandann en látum það liggja milli hluta í bili. Kreppan er því dæmigerð ytri ógn, hluti af PEST, sem lítið er hægt að gera við!

Flestir vita einnig að fárviðri er einnig ytir ógn sem lítið er hægt að gera í. Við höfum reyndar sérfræðinga sem spá fyrir um yfirvofandi hættu og ef við teljum mikla hættu á fárviðri þá reyna amk flestir að búa sig sem best undir það. Auðvitað tekst það ekki alltaf og auðvitað hafa sérfræðingar ekki alltaf rétt fyrir sér. Við erum þó almennt á því að allur sé varinn góður.

Ef mjög margir sérfræðingar spá fárviðri þá er væntanlega ekki skynsamlegt að velja þann dag til að liggja í sólbaði, eða hvað?

Markaðsfræðin vinsæl grein

Mikil aðsókn í viðskipta- og hagfræðideild HÍ
Viðskipta- og hagfræðideild býður nemendum upp á metnaðarfullt og krefjandi nám í
Um þúsund umsóknir hafa borist í viðskipta- og hagfræðideild Háskóla Íslands fyrir haustið 2008. Námsframboð er all fjölbreytt en boðið er upp á grunnnám í viðskiptafræði og hagfræði, framhaldsnám í stjórnun, fjármálum, reikningshaldi, mannauðsstjórnun og markaðsfræði og alþjóðaviðskiptum að ógleymdu MBA námi. Haustið 2008 verður í fyrsta sinni boðið upp á skipulagt BS nám samhliða starfi í viðskiptafræði og hafa borist um 100 umsóknir í það nám.
Í grunnnám í viðskiptafræði bárust vel á fjórða hundrað umsóknir en nemendur geta skráð sig á fjögur áherslusvið, fjármál, markaðsfræði og alþjóðaviðskipti, reikningshald og stjórnun og forysta.

Markaðsfræði vinsæl grein
Í ár, rétt eins og nokkur undanfarin ár, er markaðsfræðin vinsæl en tæp 48% allra umsókna í grunnnám eru í þá áherslulínu. Um 20% eru í fjármál og stjórnun og 12% í reikningshald.

 Markmið náms í viðskiptafræði með áherslu á markaðsfræði og alþjóðaviðskipti er þríþætt. Í fyrsta lagi að búa nemendur undir almenn stjórnunarstörf, í öðru lagi að búa nemendur undir sérfræðistörf í markaðsdeildum fyrirtækja eða stofnana og í þriðja lagi að búa nemendur undir framhaldsnám á sviði markaðsfræði og og alþjóðaviðskipta. Að loknu námi eiga nemendur að geta:

• tekið þátt í gerð markaðs- og eða viðskiptaáætlana fyrir fyrirtæki eða stofnanir, á innanlands- eða alþjóðamarkaði.
• unnið að ýmsum sérhæfðum verkefnum er tengjast markaðsáætlanagerð s.s. markaðsgreiningu, markaðsrannsóknum, þjónusturannsóknum og gerð kynningaráætlana.
• fjallað um og kynnt niðurstöður verkefna á íslensku og ensku.

Meðal sérgreina eru námskeið í markaðsrannsóknum, utanríkisviðskiptum, stjórnun viðskiptasambanda og vörumerkjastjórnun, stjórnun viðskipta í ólíkum menningarheimum, alþjóðamarkaðsfræði og markaðsáætlanagerð.
 

Góður, betri, bestur

Misskilin velgengni!
Helgina 10-11 maí sá Viðskiptaráð ástæðu til að óska Háskólanum í Reykjavík til hamingju með að vera á meðal 50 "BESTU" háskóla í vestur Evrópu. Hér er auðvitað um stórfrétt að ræða enda sá Viðskiptaráð ástæðu til að koma hamingjuóskum sínum á framfæri með tveimur heilsíðu auglýsingum í dagblöðum helgarinnar.
Hið sorglega er þó að Viðskiptaráð hefur eitthvað misskilið upplýsingarnar sem finna má á heimasíðu Eduniversal en þar kemur hvergi fram að um sé að ræða tilnefningu á "BESTU" háskólunum. Hér er vert að benda á að aðalsmerki góðra háskóla er að þjálfa nemendur í greinandi hugsun og að þeir leggi mat á þær upplýsingar og gögn sem tengjast því viðfangsefni sem fengist er við hverju sinni. Því eru lesendur eindregið hvattir til að kynna sér niðurstöðurnar sem og forsendur matsins á heimasíðu Eduniversal www.eduniversal.com/ 

 Um hvað snýst málið?
 Eduniversal er ekki viðurkennd matsstofnun á gæðum háskóla og hefur litla sem enga reynslu af slíku mati. Matið snýst ekki um gæði heldur er verið að leggja mat á vitund og að einhverju leyti velvilja. Á heimasíðu Eduniversal kemur fram að um sé að ræða "top internationally known business schools" og þarf töluvert hugmyndaflug til að álíta sem svo að beint samband sé á milli vitundar og raunverulegra gæða háskóla.
Könnun Eduniversal stenst á engan hátt þær kröfur sem gerðar eru við mat á gæðum háskóla. Mjög óljósar upplýsingar er að finna varðandi þau viðmið sem höfð voru til grundvallar, hvaða vægi þau viðmið höfðu og síðast en ekki síst hvernig skóli varð gjaldgengur í matið. Fram kemur að 12 manna nefnd lagði einhvers konar mat á 4000 skóla á einum degi en það þarf ekki mikla reiknikunnáttu til að átta sig á því að hver skóli hefur ekki fengið langan tíma. Reyndar verður að telja afar ólíklegt að allir skólarnir hafi verið skoðaðir með þeim hætti að hægt væri að leggja raunhæft mat á gæði þeirra eftir þá skoðun.
Margir aðilar hafa í gegnum tíðina haft hagsmuni af því að selja fyrirtækjum, stundum stofnunum, aðgang að heimasíðu sinni í þeim tilgangi að byggja upp vitunda fyrir viðkomandi fyrirtæki eða stofnun. Eduniversal virðist nýta sér þetta þekkta viðskiptamódel og markhópurinn eru skólar sem selja fræði fyrir fé. Í sjálfu sér er ekkert athugavert við það en að álíta að vefgalskapur í tengslum við þá starfsemi hafi eitthvað með gæði að gera er fráleitt.

Meira um vitund!
Í  þessu vitundarsamhengi er  vert  að  benda á  vefsíðu  rannsóknarstofnunarinnar  CSIC.  Þar er  háskólum víða um heim raðað eftir akademískum sýnileika þeirra á netinu. Stofnunin leggur áherslu á að hér sé ekki um hefðbundið gæðamat að ræða en bendir á að góður skóli með lítinn akademískan sýnileika á Netinu sé afar sjalfgæft fyrirbrigði.
Bandarískir háskólar raða sér í efstu sætin en þeir efstu eru MIT, Stanford, Harvard, PennState og Berkeley en þessir skólar raða sér einnig mjög ofarlega á hefðbundnan lista þar sem skólum er raðað eftir gæðum. Í Evrópu eru í efstu sætunum Cambridge, Oxford, SFIT, University of Helsinki og University of Osló. Einnig allt skólar sem þekktir eru fyrir að vera góðir og öflugir háskólar.
Á síðunni er birtur heimslisti og Evrópulisti. Á Evrópulistanum er Háskóli Íslands í 92. sæti, 258. á heimslistanum, og Kennaraháskólinn í 456. sæti, 1124. á heimslistanum. Aðrir íslenski háskólar komust ekki á top 500 Evrópu listann!
Á síðunni er þó birtur top 100 listi fyrir hvert land og má sjá niðurstöður fyrir Ísland hér. Þar sést að Háskóli Íslands ber höfuð og herðar yfir aðra háskóla hvað akademískan sýnileika varðar og eftir sameiningu HÍ og KHÍ verð þeir yfirburðir enn augljósari.

Kannski að eigandi Háskóla Íslands og Kennaraháskóla Íslands ætti að óska þessum skólum til hamingju með þennan frábæra árangur!
Heilsíða í Fréttablaðinu og/eða Morgunblaðinu væri þá við hæfi. 

Þegar vegur verður tröð!

Í síðstu viku kom út sérrit Viðskiptablaðsins sem ber heitið Menntavegurinn, tímarit um framhaldsmenntun á háskólastigi. Í inngangi að tímaritinu segir að nú sé fjallað um framhaldsnám á háskólastigi með áherslu á fjármál og stjórnun.
Í fyrstu virðist þetta áhugavert og um leið lofsvert framtak, enda mikilvægt að almenningur fái greinargóðar upplýsingar um það nám sem í boði er á þessu sviði.

Vonbrigði!
Þegar tímaritinu er flett kemur í ljós að verulegur galli er á efnistökum þess. Hallar þar verulega á umfjöllun um nám við Viðskiptafræðideild Háskóla Íslands en sú deild hefur flesta nemendur í framhaldsnámi á sviði stjórnunar, markaðsfræði, alþjóðaviðskipta og reikningshaldi og endurskoðun. Að vísu er umfjöllun og viðtal við forstöðumann MBA náms við Háskóla Íslands en sú umfjöllun er ekki fyrr en á bls. 43. Það sem vekur sérstaka athygli er það rými sem Háskólinn í Reykjavík fær. Af þeim 27 umfjöllunum í tímaritinu eru 12 tengdar HR og þar af eru amk 2 sem ekki snúast um framhaldsnám, heldur grunnnám eða símenntun. Tímaritið sér ástæðu til að vera með ein 4 "drottningarviðtöl" við fyrrum nemendur í MBA námi við HR, sem er gott fyrir þau, en ekkert slíkt er við fyrrum MBA nemendur úr HÍ. Hefur þaðan þó margt mjög svo frambærilegt fólk lokið námi.

Sögufölsun?
Hið alvarlega er þó sú staðreynd að í rímaritinu er hvergi, ef frá er talið MBA námið, fjallað um framhaldsnámi í Viðskiptafræðideild HÍ. Viðskiptafræðideild hefur sem sérsvið kennslu og rannsóknir á sviði viðskiptafræðigreina, s.s. stjórnunar og fjármála, en eins og áður hefur komið fram átti Menntavegurinn að vera með sérstaka áherslu á þessi svið. Framhaldsnámið í Viðskiptafræðideild á nú um þessar mundir 10 ára afmæli og hafa því mjög margir nemendur fengið sína framhaldsmenntun þar. Í boði eru 6 námsleiðir sem ekkert er minnst á, rétt eins og þær séu ekki til. Þessar námsleiðir eru MS í fjármálum fyrirtækja, MS í mannauðsstjórnun, MS í markaðsfræði og alþjóðaviðskiptum, MS í stjórnun og stefnumótun og MS í viðskiptafræði. Í tímaritinu Menntavegurinn, tímarit um framhaldsmenntun á háskólastigi þar sem sérstök áhersla er lögð á stjórnun og fjármál, er ekkert fjallað um þessar greinar. Hvernig má það vera? Er þetta kannski með vilja gert? Er hugsanlegt að einhverjir hafi af því hagsmuni að fela þá staðreynd að Viðskiptafræðideild hefur verið í farabroti í framhaldsmenntun á þessu sviði?

 Vegur verður tröð
Niðurstaðan er því sú að tímaritið gefur mjög villandi mynd af stöðu og framboði framhaldsmenntunar á sviði stjórnunar og fjármála þar sem hallar verulega á hlut Viðskiptafræðideildar Háskóla Íslands. Það er auðvitað með öllu óásættanlegt. Það er einnig nokkuð augljóst að Menntavegurinn stendur alls ekki undir nafni, Menntatröð, tímarit um valið framhaldsnám á ýmsum stigum, hefði verið mun betra, amk meira lýsandi, heiti.

Skrár tengdar þessari bloggfærslu:

• c_documents_and_settings_thorgud_my_documents_word_h_deild_vhdhi_plakot_kynn08_ms.pdf

Hafa auglýsingar áhrif!

Margir hafa efasemdur um að auglýsingar hafi áhrif. Aðrir eru sannfærðir um að þær hafi áhrif en vita ekkert endilega hvaða áhrif það eru né heldur hvaða áhrif það ættu að vera.

Stundum er litið svo á að ef fólk sér eða heyrir auglýsingu, þá hafi hún skilað tilætluðum árangri. Það er vissulega forsenda fyrir því að auglýsing skili árangri að einhver sjái hana eða heyri. Það eitt og sér dugar þó skammt. Eitt megin hlutverk markaðsstarfs er að hafa áhrif á hegðun fólks. Fá fólk til að gera meira af einhverju, minna af einhverju, kjósa rétt, kjósa ekki rangt, kaupa einhverja vöru og svona mætti lengi telja. Auglýsingar einar og sér geta ekki gegnt þessu hlutverki, heldur þarf að nota aðra markaðs- og kynningarráða til að ná tilætluðum árangri.

Í nýlegri könnun, Þjóðarrýni 2007, kemur fram að fólk telur að auglýsingar hafi áhrif á kauphegðun fólks, bara ekki þeirra eigin. Þannig eru ekki nema rétt rúm 50% sammála eða mjög sammála því að auglýsingar hafi áhrif á þeirra eigin kauphegðun á meðan að tæp 90% eru mjög eða frekar sammála þeirri fullyrðingu að auglýsingar hafi áhrif á kauphegðun fólks. Sjá nánar á www.hi.is/~th

Traust til stjórnmálamanna

Í nýlegri könnun, Þjóðarrýni 2007, kemur fram að almenningur virðist vantreysta stjórnmálamönnum. Þannig telja aðeins 20% líklegt eða mjög líklegt að stjórnmálamenn standi við gefin loforð. Um 80% telja hins vegar líklegt eða mjög líklegt að fólk almennt standi við gefin loforð. Sjá nánar á www.hi.is/~th