Ölvaður Ögmundur!

Innslag Kastljóss sl. föstudagskvöld þykir mér eitthvað það alundarlegasta sem fram hefur komið í fjölmiðlum síðustu vikur og mánuði. Í inngangi er því haldið fram að Ögmundur hafi verið undir áhrifum áfengis við atkvæðagreiðslu og sterklega gefið til kynnað að það "ástand" hafi þá væntanlega haft áhrif á þann gjörning.

Ég tek fram að ég er enginn sérstakur vildarvinur Ögmundar og ekki er ég að mæla með því að fólk sé almennt drukkið í vinnunni. Hér þykir mér hins vegar nokkuð langt gengið. Var Ögmundur ölvaður? Dugar að drekka 1-2 vínglös með mat til að réttlæta það að tilkynna alþjóð að viðkomandi hafi verið drukkinn í vinnunni? Vissi dagskrárgerðarfólk eitthvað um þetta og var eitthvað í framferði þingmannsins sem gaf tilefni til að upplýsa þjóðina með þessum hætti?

Ég er einn af þeim fjölmörgu sem bera traust til RÚV. Þessi fréttaflutningur þykir mér hins vegar fyrir neðan allar hellur. Ég dreg stórlega í efa að sú mynd sem dregin var upp af Ögmundi eigi rétt á sér. Í mínum huga ber þessi fréttaflutningur því merki vinnubragða sem eru ekki RÚV til sóma.

Ef þetta er skilningur fjölmiðlamanna á gegnsæi og að hafa allt upp á borðinu þykir mér það ágæta fólk vaða í villu. Væri ekki nær að eyða aðeins meiri tíma í einstök mál og fjalla um það sem raunverulega skiptir máli. 

Athugasemdir

[Sigurbjörg Eiríksdóttir, 20.12.2009 kl. 13:46]

Tek undir hvert orð. Gæti trúað að mikill meirihluti þjóðarinnar geri það. Ómar Ragnarsson sá ágæti bindindismaður, bloggar líka í þessa veru.

[Flosi Kristjánsson, 20.12.2009 kl. 17:09]

Þetta var afskaplega furðuleg umfjöllun hjá Kastljósinu og endaði í raun í lausu lofti.

[Gunnlaugur I., 20.12.2009 kl. 18:42]

Sæll Þórhallur.

Flott grein hjá þér. Þessi umfjöllun Kastljóss var lágkúruleg árás á einhvern ærlegasta og heiðarlegasta þingmann Alþingis.

[Helga Kristjánsdóttir, 21.12.2009 kl. 01:23]

  Menning Íslendinga hefur breyst og þykir sjálfsagt að dreypa á léttvíni með mat,það gerir engan ölvaðan.  Það vita allir að Ögmundur er heiðarlegur,matur og rauðvínsglas breytir honum ekki.

[Guðbjörn Guðbjörnsson, 21.12.2009 kl. 11:16]

Algjörlega sammála þér!

[Einar Björn Bjarnason, 22.12.2009 kl. 00:38]

Tek undir þetta, - en bendi á, að ég hef ekki lengur trú á fréttaumfjöllun RÚV.

Reyndar, hefur mér þótt hún svo léleg, að oft hefur mér fundist gagnlegra að skoða fréttir af Íslandi, í erlendum fjölmiðlum.

Kv.